بہاول پور: اسلامیہ یونیورسٹی بہاولپور کے وائس چانسلر پروفیسر ڈاکٹر محمد کامران نے چین کے شہر ویفانگ میں چائنا پاکستان ماڈرن ایگریکلچر انڈسٹری ایجوکیشن کولیبریٹو انوویشن ڈویلپمنٹ کانفرنس میں شرکت کی۔ اپنے خطاب میں وائس چانسلر نے دونوں دوست ہمسایہ ممالک کے درمیان تعلیمی اور صنعتی تعاون اور اشتراک ،مشترکہ منصوبوں فیکلٹی اور طلباء کے تبادلے کے پروگراموں اور تکنیکی اور تعلیمی تعاون کو مزید بڑھانے پر زور دیا۔
اسکل ڈویلپمنٹ اینڈ انٹرپرینیورشپ پنجاب کے سیکرٹری نادر چٹھہ ،بیجنگ میں پاکستانی سفارت خانے کے سائنس کونسلر خان محمد اور ایم این ایس ایگریکلچر یونیورسٹی ملتان کے شعبہ باغبانی کے چیئرمین تنویر احمد نے کانفرنس سے کلیدی مقررین کے طور پر خطاب کیا۔ اس موقع پر اسلامیہ یونیورسٹی آف بہاولپور اور سکول انٹرپرائز کوآپریشن چائنہ کے درمیان تعاون اور اشتراک کے معاہدے پر بھی دستخط ہوئے۔
اس موقع پر اسلامیہ یونیورسٹی بہاولپور کے سینئر فیکلٹی ممبر پروفیسر ڈاکٹر نوید اسلم ملغانی بھی موجود تھے۔ یہ معاہدہ پاکستان اور چین کے درمیان زراعت کے شعبے میں موجودہ تعاون کو مزید فروغ دینے کی راہ ہموار کرے گا تاکہ صنعت اور اکیڈمیا زرعی تکنیکی تعلیم کو جدید بنانے میں روابط کو مضبوط اور پائیدار زراعت کے لیے مربوط کوششیں کر سکیں۔ دورے کے دوران چین پاکستان ڈیجیٹل ایجوکیشن الائنس کے قیام پر بھی بات چیت کی گئی۔
