شانگلہ (صدائے پاکستان):وفاقی وزیر و صدر مسلم لیگ (ن) خیبر پختونخوا انجینئر امیر مقام نے حالیہ طوفانی بارشوں اور سیلاب سے متاثرہ ضلع شانگلہ کا دورہ کیا۔ وفاقی وزیر حالیہ طوفانی بارشوں اور سیلاب سے متاثرہ علاقوں پورن، چکیسر گئے۔ اپنے دورے کے دوران وفاقی وزیر انجینئر امیر مقام نے متاثرہ علاقوں کا جائزہ لیا۔ انہوں نے مقامی ہسپتال میں سیلاب کے دوران زخمی ہونے والے شہریوں کی عیادت کی اور متاثرہ خاندانوں سے ملاقات کرکے ان سے تعزیت کا اظہار کیا اور اپنی طرف سے مالی امداد فراہم کی۔ انہوں نے زخمیوں کی جلد صحت یابی کے لیے دعا کی۔ وفاقی وزیر انجینئر امیر مقام نے ریلیف اور ریسکیو کیمپ کا بھی دورہ کیا۔ انہوں نے اس مشکل وقت میں عوام کا ساتھ دینے اور اپنی مدد آپ کے تحت امدادی کارروائیوں پر رضا کاروں کو داد دی اور خراج تحسین پیش کیا اور اپنی طرف سے مالی امداد بھی فراہم کی۔
اس موقع پر شدید زخمی بچے کی حالت دیکھتے ہوئے وفاقی وزیر انجینئر امیر مقام نے اسے فوری طور پر پشاور منتقل کرنے کے احکامات جاری کئے اور بچے کے خاندان کو مالی امداد بھی فراہم کی۔ وفاقی وزیر انجینئر امیر مقام مشکل حالات اور رابطہ سڑکوں کی بندش کے باوجود الپورئی، شاہپور، چکیسر، مارتونگ سے ہوتے ہوئے پورن اپنے عوام کے پاس پہنچے جو اس وقت مشکل میں ہیں۔ وفاقی وزیر انجینئر امیر مقام نے یقین دہانی کرائی کہ متاثرین کی ہر ممکن مدد کی جائے گی اور بحالی کے عمل کو تیز کیا جائے گا۔ انہوں نے کہا کہ وفاقی حکومت اس مشکل گھڑی میں عوام کے ساتھ کھڑی ہے اور متاثرین کو تنہا نہیں چھوڑے گی۔