بہاول پور(صدائے پاکستان) جشن آزادی پاکستان اور معرکہ حق میں شاندار کامیابی کے سلسلے میں سابق گورنر پنجاب میاں بلیغ الرحمن کی رہائش گاہ پر ایک تقریب منعقد ہوئی۔ اس موقع پر ممبر پنجاب اسمبلی و پارلیمانی سیکرٹری پلانگ اینڈ ڈویلپمنٹ پنجاب ڈاکٹر رانامحمد طارق خان اور سابق گورنر پنجاب میاں بلیغ الرحمن نے کیک کاٹا اور شرکاء کو مبارک باد پیش کی۔
تقریب میں پاکستان مسلم لیگ ن کے سابق اراکین قومی و صوبائی اسمبلی پروین مسعود بھٹی، حاجی ذوالفقار علی، فوزیہ ایوب قریشی، حسینہ ناز، مسلم لیگی کارکنان میاں شاہد اقبال راؤ رضوان رشید، ذیشان خالد، عمران معاذ، انفارمیشن سیکرٹری پاکستان مسلم لیگ فہیم حسن قریشی،ضلعی سیکرٹری اطلاعات پاکستان مسلم لیگ ن وسیم قریشی بھی موجود تھے۔تقریب سے خطاب کرتے ہوئے سابق گورنرپنجاب نے کہا کہ پیارا ملک پاکستان لاکھوں شہداء کی قربانیوں کا ثمر ہے۔ہمیں اپنے ملک کی حفاظت اور ترقی کے لیے ہر ممکن کردار ادا کرنا ہوگا۔انہوں نے کہا کہ جس طرح ہماری پاک فوج نے معرکہء حق میں دشمن ملک کے دانت کھٹے کیے ہیں وہ پاکستانی تاریخ کا روشن باب بن چکا ہے۔
تقریب سے خطاب کرتے ہوئے پارلیمانی سیکرٹری برائے پلانگ اینڈ ڈویلپمنٹ پنجاب ایم پی اے ڈاکٹر رانا محمد طارق خان نے کہا کہ پوری قوم نے جوش و خروش سے آزادی کے جشن میں حصہ لیا ہے کیونکہ یوم آزادی اور معرکہ حق میں کامیابی کی وجہ سے ہماری خوشی دوگنا ہے۔ہماری بہادر فوج نے بھارت کو منہ توڑ شکست دی ہے اورمعرکہ حق بنیان مرصوص کی کامیابی کے پوری دنیا میں چرچے ہیں۔انہوں نے کہا کہ پوری قوم بہادر افواج کے ساتھ سیسہ پلائی ہوئی دیوار بن کر کھڑی ہے۔ انہوں کہا کہ وزیر اعلیٰ پنجاب دن رات پنجاب کی عوام کی ترقی کے لیے کوشاں ہیں،اسی طرح وزیر اعظم پاکستان ملکی معیشت کے لیے اپنی ٹیم کے ہمراہ دن رات محنت کررہے ہیں۔ انہوں نے کہا کہ ہم ان شا اللہ اس ملک کو قائد اعظم کے وژن کے مطابق بنا نے کے لیے کوئی دقیقہ فروگذاشت نہیں کریں گے۔
٭٭٭